Жасы 40-тан асқан еркектерге шаш бояуға тыйым салынды

Түркіменбашы Гурбангулы Бердімұхамедов өңірге іссапармен келген жағдайда онымен кездесуге тек шашына ақ түскен шенеуніктер ғана кіргізіледі. Түркіменстанның шығысындағы Лебап аймағында 40 жастан асқан ер шенеуніктерге ақ шашпен жүруді міндеттеген, деп хабарлайды Almaty.tv тілшісі Азаттықтың Түркімен қызметіне сілтеме жасап.

Осылайша мемлекеттік қызметкерлер самайына ақ түскен ел президенті Гурбангулы Бердімұхамедов сияқты ақ шашпен жүруі тиіс. Азаттықтың Түркімен қызметінің хабарлауынша, 1 ақпаннан бастап шенеуніктер, мұғалімдер мен дәрігерлерге шаш боюға тыйым салынған. Шашына ақ түспегендер шаштарын аққа не сұрға бояуы тиіс.

Азаттықтың Түркімен қызметінің дерегінше, егер президент Бердімұхамедов аймаққа келе қалған жағдайда шашына ақ түскен шенеуніктер ғана кездесуге кіргізіледі.

2019 жылы қаңтарда Түркіменстанның мемлекеттік мекемелеріне, мектеп, ауруханаларға Бердімұхамедовтің жаңа портреттерін сатып алу міндеттелген. Жаңа портреттерде президенттің шашына ақ түскені байқалады. Бұған дейінгі портреттерде оның шашы қара болған еді.