Қарғын су: Олжас Бектенов шығынды есептеу жұмысын тездетуді тапсырды

31 мамырға дейін су тасқынынан келген шығын есептеліп, нақты сандар белгілі болады. Үкімет басшысы Олжас Бектенов бұл шаруаны тездетіп қолға алуды тапсырды, деп хабарлайды Almaty.tv.

Ал вице-премьер Қанат Бозымбаев республика бойынша 30 мыңнан астам отбасы 100 айлық есептік көрсеткіш көлемінде бір реттік төлем алғанын айтты. 15 мыңнан астам үй мен саяжай құрылысы тексеріліп, 11 мың 134-і бойынша бағалау жүргізілген.

– Жекелеген өңірлерде сараптаманың төмен көрсеткіші байқалды. Сонымен қатар техникалық тексеру және бағалау жұмысы үйлестіріліп, барлық қажетті қорытындыны мүмкіндігінше қысқа мерзімде ұсынылуын қамтамасыз ету керек, – деді ҚР Премьер-министрінің орынбасары Қанат Бозымбаев.

Қанат Бозымбаевтың айтуынша, елімізде 9 мыңнан астам үй қалпына келтірілуге болатын құрылыс қатарына жатады. 4 мың 315 баспана апатты жағдайда деп танылған. Құрылыс маусымының қысқалығын ескере отырып, оқу жылының басына дейін зардап шеккен азаматтарға үй мен пәтер беру жоспарлануда. Ал Премьер-министр Олжас Бектенов кейбір өңірде жұмыстың баяу жүріп жатқанын сынға алып, тиісті тапсырма жүктеді.

– Әкімдерге Өнеркәсіп министрлігімен бірге тұрғындардың баспаналары мен мүліктеріне келтірілген залалды бағалау жұмысын осы аптаның соңына дейін аяқтауды тапсырамын. Азаматтарымыздың қиын жағдайына түсіністікпен және жан-жақты мұқият қараңыздар. Жұмыстарды кешіктірмей, барынша тездету керек, – деді ҚР Премьер-министрі Олжас Бектенов.

Оқи отырыңыз: Су тасқыны: Махамбет ауданында 300-ден аса азамат қауіпсіз жерге көшірілді