Қарағанды облысында Молодежный кентінің тұрғындары 2 күннен бері жылусыз отыр. Пәтерлерде ауа температурасы 11-12 градусқа дейін төмендеп кеткен. Тұрғындар жыл сайын «қазандық жөнделіп, құрал-жабдықтар ауыстырылды» деп мәлімет тарататын әкімдік жұмысы ақылға қонымсыз екенін айтып, шағымын әлеуметтік желіде жарыса жазды, деп хабарлайды Almaty.tv.
Кейбір азаматтар үйін тастап, туыстарын паналауды жөн көрген. Ал амалсыз қалың көрпеге оранып, қосымша жылытқышты қосқан тұрғындар жылу мен тоқ көзі үшін де ақша төлейтінін айтып, дабыл қағуда.
– Қазандыққа қатысты айтар болсақ, бүгін таңертең тағы ақау болды. Халыққа ескертілді. Дегенмен, конвейер қайтадан істен шығып, кедергілер туындады. Қазір барлық жөндеу жұмысы аяқталды, қазандық қалыпты жұмыс істеп тұр. Жылу беруді арттырып жатырмыз, – деді Молодежный кентінің әкімі Қарлығаш Шалабаева.
Үйі салқындап, баспанадан береке қашқан тұрғындар жылу қазандықтарын тексеру үшін Үкімет арнайы комиссия шақыруды көздеп отыр. Өйткені Шахтинск қаласындағы апатты жағдай көптің есінен әлі кете қойған жоқ. Сол кездегі күйді қайта кешеміз бе деп алаң қылған жұрт аязды былай қойғанда, көктемгі ызғарға төтеп берер күш қалмағанын айтты.
– Қазандықтардағы конвейердегі шынжырлар үзіліп кетті. Он қазандық жұмыс істеп тұр. Қазіргі таңда ақаулар жойылды, штаттық режимде жұмыс істеуде жалғасуда, – деді Осакаров ауданы ТҮКШ, Жолаушылар көлігі, автокөлік жолдары және тұрғын үй инспекциясы бөлімінің басшысы Саят Бекембаев.
Оқи отырыңыз: Апатты үй: атыраулықтардың баспана мәселесі қалай шешіледі
