Төтенше жағдай: атыраулықтар қақаған қыста баспанасыз қалды

Атыраудың тұтас бір шағынауданында төтенше жағдай жарияланды. Жер астынан шыққан су баспаналарды басып қалған. Соның салдарынан жұрт қақаған қыста далада қалды, деп хабарлайды Almaty.tv.

Жер үй салып қоныстанғанына 20 жылға жуықтаған Жұлдыз-1 ықшамауданының халқы тыныш ұйықтаудан қалған. Баспанасының қабырғасы жарылып, сыз тартқаны былай тұрсын, еденді көтерсе, астында су шығатынын азаматтар билік өкілдеріне талай көрсеткен. Құлағалы тұрған үйлер де аз емес. Арызы атқамінерлерге жетпеген жұрт әкімдікті сотқа берген.

– Жер берілгенде инфрақұрылымның бәрін қосты. Адамға өмір сүруге жағдай жасалуы керек. Солай ма? Судың кірісін жасады, неге халық шығысын 2030 жылға дейін күту керек? Халық өз күшімен мына суды тарта алмайды ғой. Қанша талпынсақ та, біздің әліміз келмейді. Сондықтан төтенше жағдай жариялауды талап етіп тағы шықтық, – деді қала тұрғыны Айгүл Досқалиева.

Қала билігі мәселеден хабардар. Сұрауымызға жауап берген жергілікті әкімдіктің өкілдері қазір тұрғындар үшін барлық жағдайды жасап жатырмыз деп ағынан жарылды. Жобалық-сметалық құжатты да әзірлеп үлгерген. Қосымша қаржы бөлу де қарастырылып жатқан көрінеді.

– Бұл жұмысты шұғыл түрде жасап жатырмыз. Бүгінгі күні жобалық-сметалық құжаттама жасақталуда. Кәріз жүйелерін жүргізу маусым-шілдеде мемлекеттік сараптамадан шығады. Сосын ақша бөлінеді, – деді қала әкімінің орынбасары Ерболат Омаров.

Шенеуніктер күн тәртібінде дренаж жүйесін салу мәселесі тұрған жоқ екенін айтты. Ал төтенше жағдайдың нәтижелі болып-болмауы уақыт еншісінде.

Оқи отырыңыз: Жамбыл облысындағы ірі жол апаты: 25 адам зардап шекті