Абай облысында жүздеген адам тұратын ауыл ішімдіктен бас тартты

Абай облысының Полиция департаменті қоғамдық қауіпсіздікті нығайтуға, тұрмыстық құқық бұзушылықтардың алдын алуға және ауыл тұрғындары арасында салауатты өмір салтын қалыптастыруға бағытталған «Алкогольсіз ауыл» атты әлеуметтік маңызы бар бастаманы кеңейтуді жалғастыруда, деп хабарлайды Almaty.tv.

Бұл қозғалысқа Абай ауданының Медеу ауылдық округі қосылды. Қоғамдық жиында ауыл тұрғындары алкоголь өнімдерін сатудан және тұтынудан толықтай бас тарту туралы шешімді бірауыздан қабылдап, тыныштықты, отбасылық берекені және қауіпсіздікті таңдады.
Талқылау мен шешім қабылдауға ауыл әкімі Еркебұлан Кеңесбекұлы, сондай-ақ аудандық полиция бөлімінің бастығы полиция полковнигі Ержан Жұбайханұлы Қаратаев қатысты. Бастаманың бір реттік шара емес екені, оның отбасылық-тұрмыстық жанжалдардың алдын алуға, құқық бұзушылықтарды азайтуға және жастарды зиянды әдеттерден қорғауға бағытталған ұзақ мерзімді профилактикалық шара екені атап өтілді.

Бүгінде округте 428 адам тұрады, 77 аула және 51 шаруа қожалығы бар. Бұл сандардың артында — тәртіп пен қауіпсіздік әр адамның жеке жауапкершілігінен басталатынын түсінген ұйымшыл қауым тұр.

«Бастама “Заң мен тәртіп” қағидаты аясында жүзеге асырылуда және полицияның тұрақты профилактикалық жұмысы, халықпен диалог және жергілікті атқарушы органдардың қолдауымен сүйемелденетін болады. Қазіргі таңда Медеу округі — салауатты таңдаудың, тыныш аулалардың және ертеңгі күнге деген сенімділіктің аумағы», - деді Абай облысы Полиция департаментінің бастығы Елдар Данияров

Мұндай тәсіл өңірдегі басқа да ауылдық елдімекендер үшін үлгі болып, тұрақты тәртіптің қоғам бірлігінен басталатынын тағы бір мәрте дәлелдеп отыр.

Оқи отырыңыз: Қызылордада жантүршігерлік жол апатынан жүргізуші қаза тапты