Жалған сезім, шынайы шығын: интернет-алаяқтардан қалай сақтану керек

Егер интернетте танысқан досыңыз сізге тым жылдам сезімін білдірсе, бұл үшін ерте қуанбаған жөн, деп хабарлайды Almaty.tv.

Құқық қорғау органдары ескертеді: бұл – алаяқ болуы мүмкін. Көп жағдайда қаскөйлер жалғыз адамдарды ғаламторда тауып, өзін шетелдік, махаббат іздеуші ретінде таныстырып, ақша алдап алуға тырысады. Мысалы, жақында Астана тұрғыны осындай интернеттегі танысына 9 миллион теңге аударып жіберген.

«Назар аударуға тұрарлық белгілер: тым тез махаббат жариялау, бейнеқоңыраудан және жеке кездесуден бас тарту, аяушылық тудыруға тырысу, өміріндегі қиын жағдайлар туралы әңгімелер, соңында ақша, құжат немесе бағалы зат жіберуді сұрау», – дейді полицейлер.

Олар бейтаныс адамдардан келетін ақпаратты сыни тұрғыда бағалауға және күмәнді шоттарға ақша аудармауға кеңес береді. Егер алаяқтық әрекеттерге күмән туса, дереу «102» нөміріне қоңырау шалу қажет.

Оқи отырыңыз: Су қателікті кешірмейді: бассейнде инфекция жұқтырып алмау үшін не істеу керек