Үмітің үзілмесін: AlmatyTV-де жаңа телехикая көрерменге жол тартады

Алдағы дүйсенбіден бастап телеарнамызда "Үмітің үзілмесін" атты жаңа телехикая көрерменге жол тартады. Туынды учаскелік полицейлердің сіз бен біз біле бермейтін күнделікті өмірін көрсетеді. Тәртіп сақшыларының айналасында өрбитін сюжет желісі олардың қызметінің қыр-сырын ұғынуға мүмкіндік береді, деп хабарлайды Almaty.tv тілшісі.

Учаскелік полицейлердің күнделікті күйбең тіршілігі көрініс табатын су жаңа телехикая өзекті мәселелерді көтермек. Тәртіп сақшылары қызметі барысында куә болатын зорлық-зомбылық, ұрлық-қарлық, жемқорлық тақырыптары қозғалады. Құқық қорғаушылар тұрғындардың түйткілді мәселелерінің түйінін шешуге де қол ұшын созады.

"Учаскеліктің жұмысы былай қарап отырсаңыздар көзге көрінбейді. Ал шын мәнінде, олар тікелей халықпен етене жұмыс істейді. Олар үйінде не болса да, отбасында қандай жағдай туса да, ешқайсысына қарамай, борышын өтеп жүр", – деді телехикая сценарисі Еркебұлан Беделханұлы.

Телехикаяда Алматыға қоныс аударып келген Ләззат пен ұлы Әсеттің шым-шытырманға толы өмірі қатар бейнеленген. Қылмысқа толы ортадан қашқан жалғызбасты ана тәжірибелі учаскелік полицейлердің көмегіне сүйенуге мәжбүр. Бес бірдей тәртіп сақшысының айналасында өрбитін сюжет желісі олардың қызметінің қыр-сырын ұғынуға мүмкіндік береді.

"Сериалда менің кейіпкерім – қатардағы лейтенант жауынгер. Жұмысына да, анасына да уақыт таба біледі. Өзінің сүйген ғашына да көңілін бөледі. Ол жұмысындағы әрбір іске нақты, тиянақты қарайды", – деді актер Марғұлан Нәменов. 

"Мен үшін бұл істің қаншалықты қиын екенін көрсету маңызды болды. Себебі жергілікті полиция қызметкерлерінің жұмысы тым ауыр екенін көпшілік әдетте ұғына бермейді. Олар тұрғындардың қауіпсіздігін қамтамасыз ету үшін тәулік бойы жұмыс істейді", – деді режиссер Андрей Авдеев.

Сериалдағы әділеттілік, қауіпсіздік пен шындық үшін күрес көрерменнің де құқықтық сауаттылығы мен мәдениетін арттыруға сеп болмақ.

Еске салайын, телехикая 2 желтоқсаннан бастап сағат 13:00-де көрсетіледі.

Жансая Олжабек, Жақсылық Тілепберген

Оқи отырыңыз: Жылан – құпиялар жылы: ел тарихында қандай маңызды оқиғалар болды