17 мамырда Тоқаевтың туған күні қалай аталып өтеді

ҚР Президентінің баспасөз хатшысы Берік Уәли Facebook-тегі парақшасында Мемлекет басшысы Қасым-Жомарт Кемелұлының туған күні қалай аталып өтетініне қатысты сұраққа жауап берді.

«Соңғы күндері бірқатар ақпарат құралдарының өкілдері «Мемлекет басшысы туған күнін қалай атап өтеді?» деген сауал жолдап жатыр. Биылғы 17 мамыр жексенбі күніне сәйкес келіп отыр. Сондықтан Қасым-Жомарт Кемелұлы үйінде жұмыс істейді. Аталған датаға орай ешқандай шара өтпейді. Тіпті, Президент Әкімшілігінің қызметкерлеріне туған күнімен құттықтамау, естелік сыйлықтар тарту етпеу туралы ескерту жасалды», - деді ол.

Берік Уәлидің айтуынша, Қасым-Жомарт Тоқаев бұл күнді мүлдем тойламайтын көрінеді.

«Президент бұл күнді тойлағанды ұнатпайды. Өйткені, ол кісінің отбасында балалардың да, ересектердің де туған күні тойланбайды екен. Ондай дәстүр қалыптаспаған», - деді ол.

Президенттің баспасөз хатшысы туған күнге орай көршілес елдер басшыларынан құттықтау жеделхаттары келіп жатқанын айтты. 

«Дегенмен, ертең Қасым-Жомарт Кемелұлын туған күнімен көршілес мемлекеттердің басшылары телефон арқылы құттықтайды деп күтілуде. Қазірдің өзінде көптеген Мемлекет және Үкімет басшыларының, Парламент төрағалары мен халықаралық ұйым жетекшілерінің құттықтаған жеделхаттары келіп жатыр. Мұндай құттықтаулар әлі де келе бермек», - деді Берік Уәли.