Екінші Павлодарда Мүткенов көшесі, 53 мекенжайы бойынша орналасқан бес қабатты тұрғын үйде қайғылы жағдай орын алды, деп хабарлайды pavlodarnews.kz. Бұл туралы облыстық ТЖД-нің баспасөз қызметі мәлім етті.
«Сағат 14.40-та бірінші қабатта ас үй бөлмесінде белгісіз зат жарылып, үйдегі заттар, тұрмыстық техника жанған. Өрт сағат 15.11-де сөндірілді. Қызыл жалын сегіз шаршы метр аумақты шарпыған», - делінген хабарламада.
Жарылыс болған жерден 33 жастағы ер адам ауруханаға жеткізілген, сондай-ақ 36 жастағы ер адамның денесі табылды. Екі подъезден 60 адам эвакуацияланды. Оның 15-і – бала.
Оқиға орнында облыстық ТЖД-нің жеке құрамынан 20 адам мен бес техника, медициналық апаттар орталығынан төрт адам мен бір техника, жедел құтқару жасағынан төрт адам мен бір техника жұмыс істеді.
