Астанадағы вокзалда жолаушылардың бірі эскалаторда құлап қалған

Астанадағы вокзалда адамдар тапталып қала жаздады. Кеше теміржол бекетінде жолаушылар не пойыз жолға өте алмай, не сыртқа шыға алмай әбігерге түскен, деп хабарлайды Almaty.tv тілшісі.

Желіде желдей ескен бұл бейнежазбада кеше кешкісін болған жағдай таспаланған. Астанадағы ескі вокзалда адамдар бірін-бірі таптап өтіп жатыр. Өйтпеске амал жоқ. Қаумалаған қарашаның бірі пойызына асықса, ендігісі ғимараттан шығар есікке жете алмай әлек. Куәгерлер жолаушылардың біреуі эскалаторда құлап, зардап шеккенін айтты. Ал «Қазақстан темір жолы» оқиғаға қатысты былайша түсініктеме берді.

– Автожолдардың жабылуына байланысты жолаушылар ағыны күрт көбейіп кетті. Әрі сол уақытта екі пойыз бір уақытта келіп, жағдайды қиындатқан. Вокзал бойынша кезекші жағдайды реттеуге тырысқанымен, халық кезек сақтамаған. Эскалатордағы қауіпсіздікке де назар аудармаған. Қазір теміржол вокзалы штаттық режимде жұмыс істеп тұр, – деді  «Нұрсұлтан-1» темір жол вокзалы басшысының міндетін атқарушы Оксана Джигарина.

Теміржол бекетіндегі күтпеген кептеліс өткен сенбі-жексенбіде болған. Автожолдардың жабылуына байланысты жолаушылар ағыны күрт көбейген. Ақтүтек боранда жолда қалып қойғандар пойызбен қатынаған. Өткен аптаның өзінде бір тәулікте 500-ден астам адам құтқарылды. Алыс қалаларды айтпағанның өзінде Көкшетау, Теміртау, Қарағандыдан Астанаға жете алмай жатқандар көп.

– Машинамен қатынайтын едім. Жол жабық болғандықтан пойызбен келдік, – деді Рудный қаласының тұрғыны Әділбек Жәнібеков.

– Қыста көлікпен жүрген қиын. Сол үшін пойызбен келіп жатырмын, – деді Қостанай облысының тұрғыны Марс Сағындықов.

Қаңтар басталысымен шығыс, солтүстік, батыс өңірлерінде қыс қаһары қатты болып тұр. Тұрғындар таяқ тастам жерге жете алмай жатыр. Кешелі бері әуежайдағы жұрттың рейсі кешігіп, есі шықты. Табиғаттың тосынсыйы әлі таусылар емес. Бүгін таңнан елдің 9 өңірінде көлік қозғалысына шектеу қойылды. Мамандар азаматтарға жолға шықпауды ескертті.

Кәмшат Мұхамеджан, Данияр Омар, Дастан Темірбекұлы, «Алматы» телеарнасы, Астана

Оқи отырыңыз: ШҚО-да өртенген үйден әйелдің денесі табылды