Еркін күрестен Токио Олимпиадасына қатысатын балуандар құрамы жарияланды

Еркін күрестен Қазақстан командасының бас бапкері Әсет Серікбаев Токио Олимпиадасында бақ сынайтын балуандар тізімін жариялады. Отандық еркін күрес шеберлері төртжылдық додасында бес салмақ дәрежесінде белдеседі деп хабарлайды Almaty.tv тілшісі Olympic.kz-ге сілтеме жасап.

Токио Олимпиадасында еркін күрестен төмендегі балуандар ел намысын қорғайды:  

57 келі: Нұрислам Санаев (Ақтөбе облысы) 

65 келі: Дәулет Ниязбеков (Қызылорда облысы) 

74 келі: Данияр Қайсанов (ШҚО) 97 келі: Әлішер Ерғали (Жамбыл облысы) 

125 келі: Юсуп Батырмұрзаев (Ақтөбе облысы) 

Бас бапкер Әсет Серікбаевтың айтуынша, 74 және 125 келіге дейінгі салмақта Олимпиадаға кімдердің қатысатыны ең соңғы сәтке дейін белгісіз болған.  

«Балуандарымыз Польшада өткен Вацлав Циолковский мемориалында сынға түсті. Бұл рейтингілік турнир болғандықтан, кейбір салмақтағы мәселелер осы бәсекеден соң шешіледі деген қорытындыға келдік. Біз 74 және 125 келідегі балуандарды осы жарыста бақылап, жақсы нәтиже көрсеткен спортшыны Токиоға апаруды жоспарладық. Өздеріңіз де көрдіңіздер, Данияр Қайсанов (74 келі) пен Юсуп Батырмұрзаев (125 келі) турнирде үздік үштік қатарына енді. Елге келген соң бапкерлермен ақылдасып, соңғы рейтингілік турнирде жүлдеге іліккен спортшыларды құрамға қостық. Біз бәріне де мүмкіндік бердік. Олимпиаданың басталуынан бір айдан сәл ғана асатын уақыт қалды. Мақсатты түрде дайындалу үшін құрамды жарияладық. Токио ойындарына дейін екі-оқу жаттығу жиынын өткіземіз», – дейді Серікбаев.

Сонымен қатар, ауыр атлетикадан Зульфия Чиншанло (55 келіге дейін) және Игорь Сон (61 келіге дейін), каратэден Қазақстан құрамасының мүшесі Мөлдір Жаңбырбаева және көркем гимнастикадан Алина Әділханова және жеңіл атлеттер Иван Иванов пен Ирина Эктова Олимпиадаға жолдама жеңіп алды.

Айта кетейік, 2021 жылғы Олимпиада 23 шілде мен 8 тамыз аралығында өтеді.