Ирандағы су тасқынынан 44 адам қаза тапты

Иранда су тасқыны салдарынан 265 адам зардап шекті.  

Иранда толассыз жауған жаңбыр салдарынан су тасқыны болып, қаза тапқандар саны 44-ке жетті. Бұл туралы Mehr News Иран ақпарат агенттігі Иран төтенше жағдайлармен күрес басқармасы бастығының орынбасары Рызу Ханкеге сілтеме жасап хабарлады, деп жазады Анадолы агенттігі.  

Оның айтуынша, су тасқыны салдарынан 44 адам мерт болып, 265-і зардап шеккен.

«Табиғи апаттан Фарс провинциясында 21 адам, Гулистан провинциясында – 7, Мазендеран провинциясында – 5, Солтүстік Хорасан провинциясында – 3 адам, Кохгилуйе, Бойерахмед және Лористан провинцияларында екі адамнан, Керманшах, Хузестан, Хамадан және Симнан провинцияларында бір адамнан мерт болды», - деді  Ханке.

Оның айтуынша, Фарс, Керманшах, Гулистан, Лористан, Илам, Симнан, Солтүстік Хорасан, Резеви Хорасан, Хузистан, Бушер, Кохгилуйе және Бойерахмед, Хамадан, Керман провинцияларында 265 адам зардап шеккен. Бұған қоса, 47 адам клиникаларда ем қабылдап жатыр.