Әл-Фараби атындағы Қазақ ұлттық университетінің 356 орындық №5 жатақханасы күрделі жөндеуден өтіп, журналистика факультетінің студенттеріне салтанатты түрде қайта берілді, деп хабарлайды Almaty.tv.
Бес қабатты жаңарған ғимараттың ашылуына университет басшылығы, зиялы қауым өкілдері, ҚазҰУ түлектері, оқытушы-профессорлар құрамы мен журналистика факультетінің студенттері, БАҚ өкілдері қатысты.
Әл-Фараби атындағы ҚазҰУ-дың Басқарма Төрағасы – Ректоры Жансейіт Түймебаев студенттерді жаңа қоныстарымен құттықтады.
«№5 жатақхананың қолына қалам ұстаған қауым үшін өзіндік терең тарихы бар. ҚазҰУ-да оқыған есімі елге танымал журналистер осы студенттер үйінде тұрды. Бүгін сол дәстүр жалғасын тауып, журналистика факультетінде оқып жатқан білім алушы жастарға қолданысқа берілді. Алдағы уақытта Әл-Фараби атындағы Қазақ ұлттық университеті құрылысының екінші кезеңінде қалашықта жаңа жатақханалар бой көтеретін болады», – деді ректор.
Жөндеу кезінде ғимараттың сыртқы қасбеті жаңартылып, барлық бөлменің қабырғалары қайта сыланып, әрленді. Есік-терезе, еден төсеніштері мен жиһаздар сатып алынды.
Сонымен қатар электр жүйесі қайта жүргізіліп, жарық беруші шамдар жаңадан орнатылды. Әр секцияға заманауи душ кабиналары қойылып, санитарлық-техникалық жабдықтар ауыстырылды. Бұған қосымша ғимараттың cу құбыры мен кәріз жүйесі монтаждалды.
«Біз №15 жатақханадан қазақ журналистикасының тарихы өрбіген қасиетті мекенге қайта оралдық. Бұл тарихи сәт. Бұл жатақханада көптеген зиялы қауым өкілдері тұрған. Мұнда студенттер жайлы өмір сүруі үшін барлық жағдай жасалып отыр. Енді әр секцияда душ бар. Әр қабатта ас бөлмесі, оқу залы да қарастырылған. Жатын бөлмелері кеңейіп, жатақхананың жалпы дизайны өзгертілген. Жалпы қалашықтағы ғимараттар мен жатақханалар күн санап жаңарып келеді. Біз өте қуаныштымыз», – деді Журналистика факультетінің 1-курс студенті Хамза Ерден
«Бүгін журналистика факультеті үшін тарихи сәт. Құдай бұйыртып, тарихи жатақханамыз күрделі жұмыс жүргізіліп, қайта ашылды. Жағдайы өте керемет», – деді студент Нұрмұхаммед Райымбек.
Сондай-ақ Жансейіт Түймебаев ҚазҰУ құрылысының ІІ кезеңінің жоспарымен таныстырып, журналистер сауалына жауап берді.
Айта кетсек, №5 жатақханада соңғы бес жылда физика-техникалық факультетінің студенттері қоныстанған болатын. Әл-Фараби атындағы ҚазҰУ Басқарма Төрағасы – Ректоры Жансейіт Түймебаевтың атына түлектер тарапынан жатақхананы журналистика факультетіне қайта беру туралы ұсыныс түскен еді. Осыған сәйкес университет әкімшілігі тиісті шешім қабылдап, күрделі жөндеуден өткен жатақхана болашақ журналистерге қайта пайдалануға берілді.
